សេចក្តីពិពណ៌នា

ជំនាញម៉ាឃិតធីង កម្រិតបរិញ្ញាបត្រ ជាជំនាញដែលត្រូវការចាំបាច់សម្រាប់ក្រុមហ៊ុនអាជីវកម្ម ផលិតកម្ម ពាណិជ្ជកម្ម​ និង សេវាកម្ម និស្សិតនឹងទទួលបានការបណ្តុះបណ្តាលលើជំនាញម៉ាឃិតធីង ការគ្រប់គ្រងទីផ្សារ ការសិក្សាស្រាវជ្រាវ ការប្រមូលទិន្ន័យ ការវិភាគទិន្នន័យ ការយល់ដឹងឥរិយាបថអតិថិជន​ ការអភិវឌ្ឍផលិតផលថ្មី យុទ្ធសាស្រ្តថ្លៃ ការផ្សព្វផ្សាយបណ្តាញចែកចាយផលិតផល និងការផ្តល់សេវាកម្មអតិថិជន ផែនការយុទ្ធសាស្រ្តនិងកម្មវិធីម៉ាឃិតធីង ថែមទាំងឱ្យនិសិ្សតយល់ដឹង និងមូលដ្ឋានចំណេះដឹងជាច្រើនទៀត។ តាមរយៈការសិក្សាឯកទេសនេះ អាចឱ្យអ្នកសិក្សាមានសមត្ថភាព ធ្វើការងារម៉ាឃិតធីង ប្រកបប្រសិទ្ធភាព នៅតាមបណ្តាក្រុមហ៊ុន និងស្ថាប័នពាក់ព័ន្ធជាច្រើន។

ចំណេះដឹងមូលដ្ឋាន ៖ ដើម្បីសិក្សាជំនាញម៉ាឃិតធីង កម្រិតបរិញ្ញាបត្រ ឲ្យ​ទទួល​លទ្ធផលល្អ​​ប្រសើរ ​តម្រូវ​ឲ្យ​បេក្ខជន​មាន​ចំណេះដឹង​ជា​មូលដ្ឋាន​លើ​មុខវិជ្ជា​ភាសាអង់គ្លេស ពិជគណិត ពលរដ្ឋវិជ្ជា និងកុំព្យូទ័ររដ្ឋបាល។

គោលបំណង

កម្មវិធីសិក្សាថ្នាក់បរិញ្ញាបត្រជំនាញម៉ាឃិតធីង នៃមហាវិទ្យាល័យពាណិជ្ជកម្មនិងទេសចរណ៍ ត្រូវបានរៀបចំឡើងក្នុងគោលបំណង៖

• លើកកម្ពស់សមត្ថភាពជំនាញម៉ាឃិតធីងដល់និសិ្សតប្រកបដោយប្រសិទ្ធភាព និងគុណភាព ដែលជាតម្រូវការសម្រាប់ទីផ្សារការងារ និងមុខរបរ ធ្វើឲ្យនិសិ្សតទទួលបានប្រសិទ្ផផលក្នុងការប្រើសមត្ថភាពរបស់ខ្លួន និងមានក្រមសិល្បធម៌វិជ្ជជីវៈ
• ផ្តល់ចំណេះដឹងពីការបង្កើត និងការព្យាករណ៍ផែនការថវិកាសម្រាប់ផែនការម៉ាឃិតធីង
• ​ផ្តល់ចំណេះដឹងពីការរៀបចំផែនការយុទ្ធសាស្ត្រម៉ាឃិតធីង ដែលមានប្រសិទ្ធភាព​​
• ផ្តល់ចំណេះដឹងពីការធ្វើសវនកម្មម៉ាឃិតធីង និងអភិសមាចារ្យ (ក្រមសីលធម៌វិជ្ជាជីវៈ) ជាអ្នកម៉ាឃិតធីង ឬក៏ជាវិនិយោគិនចំណាន

លទ្ធផលសិក្សា

ក្រោយពេលបញ្ចប់ការសិក្សាថ្នាក់បរិញ្ញាបត្រលើឯកទេសម៉ាឃិតធីង និសិ្សតនឹងទទួលបាន ចំណេះដឹង ជំនាញក្នុងការគិត ជំនាញទំនាក់ទំនងអន្តរបុគ្គល និងការទទួលខុសត្រូវ ជំនាញលេខនព្វន្ត ព័ត៌មានវិទ្យា និងទំនាក់ទំនង ដូចខាងក្រោម៖

• យល់ពីវិធីសាស្រ្តគ្រប់គ្រងដំណើរការម៉ាឃិតធីង និងលក់ផលិតផល តាមរយៈការចែកចាយផលិតផលដល់ក្រុមអតិថិជន និងទីផ្សារអន្តរការី ឱ្យមានប្រសិទ្ធភាព និងទទួលផលត្រឡប់មកវិញគឺផលចំណេញ
• យល់ពីគោលការណ៍ជំនាញម៉ាឃិតធីងយ៉ាងច្បាស់លាស់ និងការប្រព្រឹត្តិទៅតាមជំហ៊ាននីមួយៗ យល់ពីដំណោះស្រាយបញ្ហាសម្រាប់ក្រុមអតិថិជន ទីផ្សារអន្តរការី ក៏ដូចជាការផ្តល់ផលិតផល និងសេវាកម្មប្រកបដោយគុណភាព
• ចេះប្រាស្រ័យទាក់ទង(Communication) និងការទំនាក់ទំនង (Relation) ល្អជាមួយក្រុមអតិថិជន ជាបុគ្គល និងទីផ្សារអន្តរការី ដោយចេះប្រើយុទ្ធសាស្ត្រ ជម្រុញ និងទាក់ទាញ ដើម្បីសម្រេចបានគោលដៅរបស់អង្គភាព
• ចេះផ្តល់សេវាកម្មអតិថិជនប្រកបដោយគុណភាព និងគុណតម្លៃ ចេះសម្តែងទឹកមុខញញឹម រស់រាយរាក់ទាក់ មានភាពរហ័សរហួន ស្រឡាញ់ឬពេញចិត្តការងារ ផ្តល់ផលប្រយោជន៍ គោរពឱ្យតម្លៃអតិថិជន និងផ្តល់ភក្តីភាពចំពោះអតិថិជន
• យល់ពីឥរិយាបថអតិថិជនដែលទាក់ទងទៅនឹងប្រជាសាស្រ្ត ភូមិសាស្រ្ត និងចិត្តសាស្រ្ត
• យល់អំពីយុទ្ធសាស្រ្ត និងកម្មវិធីម៉ាឃិតធីង ដែលទាក់ទងនឹងផលិតផល ការផ្សព្វផ្សាយ ការកំណត់ថ្លៃ យុទ្ធសាស្រ្តពង្រីកនិងទន្ទ្រានទីផ្សារ ទំហំទីផ្សារ ចំណែកទីផ្សារ និងគូប្រកួតប្រជែង
• យល់ដឹងយ៉ាងច្បាស់ ពីការវិភាគSWOT និងយុទ្ធសាស្រ្ត ទប់ទល់នឹងស្ថានភាពប្រឈមផ្សេងៗ
• អាចព្យាករណ៍ វាស់វែង និងវាយតម្លៃទៅលើ 4Ps, 5Ps and 7Ps
• យល់ដឹងអំពីបរិយាកាសម៉ាឃិតធីង PESTL ស្ថានភាពក្រុមអតិថិជន ទីផ្សារ និងបរិបទថ្មីដែលកើតមានឡើងដោយសារការផ្លាស់ប្តូរបរិយាកាសឬស្ថានភាព
• យល់ដឹងអំពីប្រតិបតិ្តការម៉ាឃិតធីង ក្រមសីលធម៌អាជីវកម្ម វប្បធម៌សង្គមផ្សេងៗ និងកាតព្វកិច្ច ចំពោះសាធារណៈជន និងសង្គមជាតិ
• ចេះវិភាគកាលានុវត្តភាព និងរៀបចំអាជីពរបស់ខ្លួន
• ចេះសម្រេចចិត្តត្រឹមត្រូវដោយផ្អែកលើការវិភាគអំពីស្ថានការណ៍ឬព្រឹត្តិការណ៍នានា ដើម្បីដោះស្រាយបញ្ហានានា ដោយទំនុកចិត្ត និងមានប្រសិទ្ធភាព
• ចេះគិត វិភាគដើម្បីធ្វើម៉ាឃិតធីង និងលក់ សេវាកម្មឬផលិតផលក្នុងទីផ្សារដោយប្រសិទ្ធភាព
• ចេះវិភាគបង្កើតគំនិតផ្តួចផ្តើមថ្មីៗ ឬបំផុសគំនិតរៀបចំផែនការអាជីពឯកទេសម៉ាឃិតធីង
• អាចផ្លាស់ប្តូរឥរិយាបថ និងបុគ្គលិកលក្ខណៈ ពីអវិជ្ជមានទៅជាវិជ្ជមាន និងមានក្រមសីលធម៌វិជ្ជាជីវៈកាន់តែល្អប្រសើរថែមទៀត
• ពូកែប្រាស្រ័យទាក់ទងអន្តរបុគ្គលជាមួយមិត្តរួមការងារ អតិថិជន និងមនុស្ស ដែលនៅជុំវិញខ្លួន ដោយជោគជ័យ និងមានប្រសិទ្ធភាព
• ចេះសម្តែងឥរិយាបថវីជ្ជមានដូចជាការគោរព ការផ្តល់តម្លៃដល់អ្នកដទៃ រួមទាំងសិល្បៈ ក្នុងការនិយាយ ស្តាប់ សម្លឹង បញ្ចេញសម្លេង បង្ហាញទឹកមុខ និងកាយវិការផ្សេងទៀត ក្នុងពេលចរចា តស៊ូមតិ និងដោះស្រាយបញ្ហ
• យល់ពីភាពជាអ្នកដឹកនាំ ដោយចេះលើកទឹកចិត្តខ្លួនឯង បុគ្គលិក និងក្រុមការងារ ឱ្យខិតខំបំពេញការងារប្រកបដោយប្រសិទ្ធភាព មានទំនុកចិត្តនិងការទទួលខុសត្រូវខ្ពស់
• ក្លាយទៅជាបុគ្គលិកមានស្នាដៃល្អ មានក្រមសិលធម៌ក្នុងការអនុវត្តការងារ និងការសម្តែងលើវេទិកាសាធារណៈបានល្អប្រសើរ
• ចេះគណនាផ្នែកលើគណិតវិទ្យា និងស្ថិតិអាជីវកម្ម តាមរយៈកម្មវិធីសិក្សាដូចជា Descriptive Statistics, Frequency Distributions, Probability, Confidence Intervals / Sample Size, Time Series / Forecasting។ល។
• និសិ្សតមានសមត្ថភាពប្រើប្រាស់កុំព្យូទ័រ បច្ចេកវិទ្យាព័ត៌មាន កម្មវិធីកុំព្យូទ័ររដ្ឋបាល ការគ្រប់គ្រងសម្ភារៈនិងផលិតផល រួមទាំងកម្មវិធីបច្ចេកវិទ្យាផ្សេងទៀត
• ចេះគណនាលេខ និងតួលេខផ្សេងៗ ដោយប្រើម៉ាស៊ីនកុំព្យូទ័រឬម៉ាស៊ីនគិតលេខ
• ចេះប្រើប្រាស់ភាសាអង់គ្លេស សម្រាប់កិច្ចការអាជីវកម្មនិងម៉ាឃិតធីង។

កម្មវិធីសិក្សា រយៈពេលបណ្តុះបណ្តាល និងចំនួនម៉ោងសិក្សា/ក្រេឌីត

ថ្នាក់បរិញ្ញាបត្រ មានកម្មវិធីសិក្សា ៤ឆ្នាំសិក្សា ដោយរាប់បញ្ចូលទាំងថ្នាក់ឆ្នាំសិក្សាមូលដ្ឋាន ត្រូវមានចំនួនក្រេឌីតសរុប ១២០ក្រេឌីត សម្រាប់និស្សិតប្រឡងបញ្ចប់ការសិក្សា និងសរសេរសារណាបញ្ចប់ ការសិក្សា។ រយៈពេលដែលរាប់ចាប់តាំងពីការចុះឈ្មោះចូលរៀនពីដំបូងទៅ មិនឱ្យលើសពី៦ឆ្នាំ។ រចនា សម្ព័ន្ធកម្មវិធីសិក្សាចែកជាពីរក្រុមធំៗ។ ក្រុមទី១ គឺជាការអប់រំទូទៅ (ថ្នាក់ឆ្នាំសិក្សាមូលដ្ឋាន) និងក្រុមទី២ គឺជាការអប់រំជំនាញ។ ចំនួនក្រេឌីតនៃក្រុមនីមួយៗត្រូវបានកំណត់ដូចខាងក្រោម៖

– ការអប់រំទូទៅ មានចំនួនក្រេឌីតនៃថ្នាក់ឆ្នាំសិក្សាមូលដ្ឋានសរុប ៣០ក្រេឌីត

– ការអប់រំឯកទេស មុខវិជ្ជាឯកទេស (Major subjects) សម្រាប់និស្សិតប្រឡងបញ្ចប់ការសិក្សា និងសម្រាប់និស្សិតប្រឡងបញ្ចប់ការសិក្សា និងសរសេរសារណាដោយរាប់បញ្ចូលទាំងមុខវិជ្ជាស្នូល (Core subjects) និងមុខវិជ្ជាជ្រើសរើស (Elective subjects)។ មុខវិជ្ជាឯកទេសសង្កត់ធ្ងន់លើចំណេះដឹង ការយល់ដឹង និងការអនុវត្តការងារជាក់ស្តែង។ ចំនួនក្រេឌីតសរុបនៃការអប់រំឯកទេសមានចំនួន ៩០ក្រេឌីត សម្រាប់មុខវិជ្ជាឯកទេស (Major subjects) និងមុខវិជ្ជាគួបផ្សំ (Minor subjects)។ ចំនួនក្រេឌីតសរុបនៃការអប់រំឯកទេស មិនរាប់បញ្ចូលមុខវិជ្ជាបន្ថែមភាសាបរទេសទេ។

ថ្នាក់បរិញ្ញាបត្រមានរយៈពេល៤ឆ្នាំ=៨ឆមាស សម្រាប់ថ្នាក់បរិញ្ញាបត្រឯកទេស៖ម៉ាឃិតធីង

• ថ្នាក់ឆ្នាំសិក្សាមូលដ្ឋានឆ្នាំទី១ =  ២ឆមាស = ១២មុខវិជ្ជា  = ៣០ក្រេឌីត
• ថ្នាក់បន្តបរិញ្ញាបត្រឆ្នាំទី២   =  ២ឆមាស = ១០មុខវិជ្ជា  = ៣០ក្រេឌីត
• ថ្នាក់បន្តបរិញ្ញាបត្រឆ្នាំទី៣   =  ២ឆមាស = ០៩មុខវិជ្ជា  = ៣០ក្រេឌីត
• ថ្នាក់បន្តបរិញ្ញាបត្រឆ្នាំទី៤    =  ២ឆមាស = ១០មុខវិជ្ជា  = ៣០ក្រេឌីត
• របាយការណ៍ ឬ / និងសារណា   = ០៦ក្រេឌីត