សាររបស់សាកលវិទ្យាធិការ

គណៈគ្រប់គ្រងសាកលវិទ្យាល័យ បានប្តេជ្ញាយកអស់កម្លាំងកាយចិត្ត បញ្ញា ស្មារតីទទួលខុសត្រូវខ្ពស់ និងប្រើប្រាស់ធនធានដែលខ្លួនមាន ដើម្បីធ្វើឱ្យសម្រេចតាមចក្ខុវិស័យរបស់ខ្លួន ជាសាកលវិទ្យាល័យដែលឈានមុខ នៅកម្ពុជាលើការអប់រំ បណ្តុះបណ្តាល និងការស្រាវជ្រាវ ប្រកបដោយគុណភាពខ្ពស់ ធ្វើឱ្យនិស្សិតកំពុងសិក្សា និងបញ្ចប់ការសិក្សា មានសមត្ថភាពជំនាញ និងក្រមសីលធម៌វិជ្ជាជីវៈច្បាស់លាស់ និងមានការទទួលស្គាល់ ជាលក្ខណៈជាតិ និងអន្តរជាតិ ដែលឆ្លើយតបទៅនឹងការរីកចម្រើនផ្នែកសេដ្ឋកិច្ចនិងសង្គមជាតិ ក៏ដូចជាបញ្ហាប្រឈម ឬតម្រូវការនៃសមាហរណកម្មអាស៊ាន និងសាកលភាវូបនីយកម្ម។ ក្នុងន័យនេះ គណៈគ្រប់គ្រងសាកលវិទ្យាល័យ បានកំណត់ទិសដៅអាទិភាព ចំនួន ៧ គឺ៖ ១-លើកកម្ពស់អភិបាលកិច្ច/ការគ្រប់គ្រង-ដឹកនាំ ២-ធ្វើបច្ចុប្បន្នភាពអភិវឌ្ឍកម្មវិធីសិក្សាឱ្យឆ្លើយតបតម្រូវការទីផ្សារការងារ ៣-ពង្រឹងគុណភាពបង្រៀននិងអភិវឌ្ឍសមត្ថភាពបុគ្គលិកសិក្សា ៤-ពង្រឹងគុណភាពសិក្សា និងស្រាវជ្រាវរបស់និស្សិត ៥-ផ្តល់សេវាសិក្សាល្អ រួមទាំងសេវាជួយរកការងារសម្រាប់និស្សិត ការលើកកម្ពស់សហគ្រិនភាពដល់និស្សិត ៦-ពង្រឹងនិងអភិវឌ្ឍប្រព័ន្ធធានាគុណភាពផ្ទៃក្នុង ៧-បន្តអភិវឌ្ឍហេដ្ឋារចនាសម្ព័ន្ធរូបវន្តនិងធនធានសិក្សា។

ដោយមានចក្ខុវិស័យច្បាស់លាស់ បេសកកម្មត្រឹមត្រូវ គោលដៅជាក់លាក់ បទពិសោធន៍ ធនធានគ្រប់គ្រាន់ និងប្រកាន់ខ្ជាប់នូវគុណតម្លៃទាំង៤ នៃការបណ្តុះបណ្តាលដែលផ្តល់នូវ “ចំណេះដឹង ចំណេះធ្វើ សីលធម៌ និងសិល្បៈនៃការរស់នៅប្រកបដោយសុខដុមនីយកម្ម” ប្អូនៗដែល សម្រេចចិត្តសិក្សានៅ HRU ពិតជាជម្រើស ដ៏ត្រឹមត្រូវ ហើយពិតជាទទួលបាននូវសមត្ថភាពជំនាញពេញលេញ ភាពជាអ្នកដឹកនាំ សហគ្រិនភាព គំនិតច្នៃប្រឌិត មនសិការការងារ ស្មារតីទទួលខុសត្រូវខ្ពស់ និងមានបុគ្គលិកលក្ខណៈសម្បត្តិល្អប្រសើរ ក្លាយជាធនធានបញ្ញាដ៏មានសក្តានុពល និងមានតម្លៃសម្រាប់ការងារ គ្រួសារ និងសង្គមជាតិ ពិសេសធ្វើឱ្យសុបិនខ្លួនក្លាយជាការពិត ព្រោះសាកលវិទ្យាល័យនេះ នឹងនាំប្អូនៗដើរលើវិថីនៃជីវិត ដែលពោរពេញដោយសមត្ថភាព ជំនាញ ភាពជឿជាក់ និងជោគជ័យយ៉ាងពិតប្រាកដ ដែលឆ្លុះបញ្ចាំងតាមរយៈ អត្រានិស្សិតមានការងារធ្វើ រហូតដល់៩៣%។

ដើម្បីឆ្លើយតបទៅនឹងការគាំទ្រ ការផ្តល់ទំនុកចិត្តមកលើគុណភាពភាពអប់រំ និងបំពេញតាមតម្រូវការនៃ ការបណ្តុះបណ្តាល សាកលវិទ្យាល័យធនធានមនុស្ស បានសម្ពោធដាក់ឱ្យប្រើប្រាស់អគារសិក្សា ផ្ទាល់ខ្លួនធំថ្មី ទំនើប កម្ពស់១២ជាន់ ដែលមានវិសាលភាពទទួលបណ្តុះបណ្តាល និស្សិតប្រមាណ ២ម៉ឺននាក់ បន្ទប់សិក្សា និងបន្ទប់ធ្វើការ បំពាក់ដោយសម្ភារឧបទ្ទេសទំនើបៗ មានបណ្ណាល័យធំទូលាយ បន្ទប់អនុវត្ត និងមានអាហារដ្ឋាន។ល។ក្នុងនាមសាកលវិទ្យាធិការ នៃសាកលវិទ្យាល័យធនធានមនុស្ស ខ្ញុំមានកិត្តិយស សូមថ្លែងអំណរគុណ យ៉ាងជ្រាលជ្រៅចំពោះ ឯកឧត្តម លោកជំទាវ លោក លោកស្រី នាងកញ្ញា ពិសេសប្អូនៗនិស្សិតទាំងអស់ ដែលបានផ្តល់ទំនុកចិត្ត និងគាំទ្រសាកលវិទ្យាល័យធនធានមនុស្សតាំងពីដើមរៀងមក ដែលនេះជាការ លើកទឹកចិត្តដ៏ធំធេងដល់យើងខ្ញុំ ក្នុងការបំពេញបេសកកម្មដ៏ថ្លៃថ្លានៃការកសាងធនធានមនុស្ស ប្រកបដោយ សក្តានុពលនិងជោគជ័យគួរជាទីមោទនៈដ៏ក្រៃលេង សម្រាប់សង្គមជាតិ ចាប់តាំងពីឆ្នាំ១៩៩៨ រហូតមកដល់បច្ចុប្បន្ន។

យើងខ្ញុំសូមស្វាគមន៍ ឯកឧត្តម លោកជំទាវ លោក លោកស្រី ប្អូនៗសិស្ស និស្សិតទាំងអស់ ដែលអញ្ជើញមកទស្សនា និងសាកសួរព័ត៌មានសិក្សា នៅសាកលវិទ្យាល័យធនធានមនុស្ស ដោយក្តីសោមនស្សរីករាយ។

សូមជូនពរសុខភាពល្អ និងជោគជ័យគ្រប់ភារកិច្ច។